Satu kali Yesus de crita begini:
“Ada Bapa satu, de pu ana laki-laki ada dua orang. Ana yang bungsu de bilang begini buat de pu Bapa, “Bapa, kase sa pu bagian dari tong pu harta. De Bapa itu iko apa yang ana tu minta. De kase ana bungsu tu pu harta. De tra tunggu lama-lama lagi. De langsung jual de pu harta smua sampe abis. Trus, de brangkat ke negri yang jau skali. Wang banyak yang de punya tu, de kase abis deng hidup iko de pu suka-suka.
Waktu de pu wang su abis begini, tiba-tiba bencana kelaparan datang di negri itu. Ana bungsu itu de jatu miskin tra laku punya. Jadi, de pigi cari kerja sama orang kaya satu. Orang kaya itu suru de pergi ke ladang untuk jaga de pu babi-babi.
Ana bungsu itu de lapar tra jadi, sampe de pi minta makanan babi dari orang-orang di situ. Tapi, dong tra kase makanan babi tu buat dia. Lantas, ana bungsu itu de sadar deng de pu keadaan. De bilang begini, “Orang bantu-bantu di sa Bapa ruma dong pu makanan tu banyak skali. Tapi sa di sini mo mati karna lapar. Sa harus kas tinggal tampa ini. Sa mo pulang ke sa Bapa. Sa mo bilang sama sa Bapa: Bapa sa dosa banyak skali. Sa dosa sama Tuhan di surga, sa dosa sama Bapa juga. Sa ni tra cocok lagi jadi Bapa pu anak. Sa jadi Bapa pu orang bantu-bantu saja.
Jadi, de berdiri, trus de jalan pulang ke de Bapa. Dari jau eee …, de Bapa su liat dia. De Bapa rasa sayang dia sampee … De Bapa tra tahan. Langsung de Bapa lari cepat-cepat, trus polo dan cium ana bungsu tu.
Deng air mata, Ana bungsu tu bilang, “Bapa eee, sa su bikin sala dan dosa banyak skali buat Tuhan; sa juga bikin sala dan dosa banya skali sama Bapa. Bapa, sa ni su tra bisa jadi Bapa pu anak lagi.”
Tapi Bapa tu de panggil de pu orang-orang bantu, “Lakas, bawa juba yang paling bagus ke sini. Kas pake juba tu di sa pu anak ni. Kas masuk cincin di de pu jari. Sarung spatu di de pu kaki dua-dua. Trus, potong anak sapi yang gemuk satu. Tong harus bikin pesta. Tong harus bersuka cita. Sa pu anak ni de su mati, tapi de su hidup lagi. De su hilang, tapi sa su dapa dia kembali.” Jadi, orang-orang di situ dong mulai pesta.
Waktu itu, anak sulung de ada kerja di ladang. Dar jau de dengar suara suling dan orang-orang menari. Lantas de panggil de hamba satu, baru de tanya. Hamba tu de bilang begini, “Tuan pu ade su pulang. Tuan pu Bapa su potong anak sapi yang gemuk satu, karna Tuan pu Bapa bisa ketemu Tuan pu ade dalam keadaan baik.”
Ana sulung itu de ganas skali. De mara skali! De Bapa keluar buat bicara deng dia. Tapi de bilang de Bapa begini, “Dari tahun ke tahun, sa su kerja tolong Bapa. Satu kali pun sa tra perna lawan Bapa. Tapi Bapa tra perna potong anak kambing satu buat sa bikin pesta deng sa teman-teman. Bapa pu anak tu su kase abis Bapa pu harta deng idop takaruang adat deng perempuan-perempuan sundal dorang. Tapi, sampe hati Bapa potong anak sapi gemuk buat dia!”
De Bapa bilang begini, “Anak eee, ko tu slalu deng Bapa. Smua yang Bapa punya tu ko punya. Tong dua harus bersyukur dan bergembira. Ko pu ade tu su mati, tapi de hidup kembali; de su ilang, tapi tong su dapat dia kembali!”
_Diceritakan kembali dari Lukas 15:32_
_Agus Sumule_
